الصيف – ومتل ما كلنا بنعرف- أنه موسم حافل بالمناسبات والأعراس، وأكتر شي لفت انتباهي خلال معظم المناسبات لحضرتها في صيف ٢٠١٩، هو أنه المكياج ما بقدر يخفي المشاكل لبتعاني منها البشرة وحتى لو البشرة ما كانت بتعاني من مشاكل واضحة وظاهرة، لكن بكون واضح أنه البشرة ما فيها نضاره وبحاجة لعناية مع المكياج أكتر…

ولهيك بلزم من كل وحدة فينا إنها تهتم ببشرتها أكتر، والمصاري الي بتنحط على المكياج نصير نستثمر جزء منها ببشرتنا! لأنه مهما كانت الـ Makeup Artist شاطرة و بتستخدم منتجات منيحة، إذا البشرة كانت بالأصل تعبانة وفيها مشاكل، بعد فترة قصيرة -من ساعة لساعتين- من الوقت رح يبين أنه بشرتك مش صحية -بالرغم من إنك حاطة مكياج- وكمان انك ما عم تعتني فيها بشكل يومي.

وتاني اشي لفتت انتباهي، أنه في كتير من الصبايا، ما يكون من أولوياتهم أنه يمسحوا المكياج عن بشرتهم بعد الحفلة/المناسبة، لأنهم بروحو متأخر وبكونو تعبانين. ولهيك انا بنصح اي صبية بتعاني من هي المشكلة أو هي المصيبة برأيي، وحتى تقلل من المشاكل الي ممكن تتعرض لها البشرة، أنه يكون معها مزيل مكياج أو Makeup Remover Wipes، وتمسح المكياج عن بشرتها وهي مروحة بالسيارة -يُفضل أنك ما تكوني بتسوقي-، وهيك بكون الضرر أخف على بشرتك من أنك تنامي والمكياج لسا على بشرتك.‎

وأخيراً، الترطيب الملائم ومحارم إزالة المكياج في السيارة وجلسة عناية بالبشرة مختصة، هو يلي بلزمك لأعراس شتاء ٢٠٢٠.